今日返工有返多少少精神啦～～

不過朝早好搞笑我竟然唔記得開早會，係完全忘記左仲係度做野，係有人黎叫我我先記得～～好在啊總今日心情幾好，冇咩野～～～～

因為近排啲野都幾趕，有啲野要當日做決定同等人回覆，所以大部份既人都要加班  (平日好多野做都唔駛加班，最多第二日追返啲野)，今日啊總竟然問我可唔可以加班，咁就死啦，因為我約左人.....(不過其實我自己期限內要做晒既都做晒，其他個啲都唔駛一定要個日完成)，我就照同老總講我約左人打波啦，勁唔好意思咁咯....不過其實都留多半個鐘係度做份野，之後佢都係咁叫我走啦，又話打波對身體好丫，係咁講....(不過好在啊總今日心情幾好...佢心情好個陣乜都得)

到走個陣勁唔好意思入啊總房同佢講，我走啦，唔好意思丫咁～我話真係估唔到今日要ot個啲咯.....咁下個星期有咩趕同你O都O掂佢之類既說話啦～～～啊總竟然搞gag....佢係度笑話：O咀丫 (佢係好鍾意成日講講下野就搞gag，好認真開開下會佢又會有幾句係度搞gag，但係多數都係冇人笑既)，不過我今次係度勁笑，因為佢講得好cute把聲～

今日打波都幾好丫，打左一陣，竟然響鐘喎......我以為打左半個鐘咋....呢度大家都真係O左咀丫，不過睇返錶原來真係打左一個鐘頭～～～已經係不停咁打冇停過，但真係一啲都唔累又唔覺～～

因為唔想咁肥，走左去食米，但唔係幾好食....啲雲吞又細粒啲又多肉碎，即係冇咩蝦，下次都係去返桂記，桂記啲雲吞大粒啲又多蝦～～

行左一陣商場消化下～～見到好多新出既日曆好靚，考慮下買返一個掛先，不過其實我平時唔係點睇日曆，我睇都係想望下有冇紅日個啲，哈哈～～如果要睇日子多數都係望電腦個日期時間個度，所以如果買日曆我主要都係用黎做裝飾，不過我間房好似冇勾個啲掛日曆，不過其車我只係睇個一刻想買啫，之後就會冇左件事～～～